2016年3月20日 星期日

馮睎乾 - 情侶不分手的哲學

香港蘋果日報   2016年3月20日

樂壇金童玉女分手的消息,不但震驚七十億人,更因為電視報紙和社交網站日夜無間地報導,終於形成Copycat效應,觸發起一輪分手潮。這夜,跟阿寶瀕臨分手邊緣的万刀甲,就約了兄弟何金水到油麻地美都訴苦。

「咩話?不分手契約?我依家又唔係自殺,簽乜契約呀?你係咪玩我呀?」万刀甲心情本已惡劣,終於忍不住要爆了。

金水先把万刀甲剛噴到衣領上的飯粒彈到鄰桌,然後不慌不忙說:「我哋受過高等教育,就算你有禮貌都唔使咁大聲嘅。不分手契約呢,其實係法國哲學界人稱『神鵰俠侶』嘅沙特同西蒙波娃所發明,我只係介紹返啫。」

万刀甲黯然地嘆了一口氣:「Sorry囉,咁你講吓個契約嘞。」

金水呷口奶茶,便開始講法國神鵰俠侶的故事:「1929年6月有一晚,24歲嘅沙特同22歲嘅波娃,坐咗喺羅浮宮花園張長櫈上面。就係呢晚,人類嘅愛情觀出現咗突破性發展,因為嗰位雖然好醜但好風流嘅沙特,居然諗到條絕世好橋,可以大條道理去犯天下男人都會犯嘅錯,而女朋友就算知都吹佢唔脹。你話哲學係咪的確係醒、的確係勁?沙特嗰晚失驚無神咁同波娃講:『不如我哋簽張愛情合約,兩年續一次好唔好?』波娃當時同佢拍咗一年拖,好自然就答:『真係㗎?點解嘅?』你估唔估到條粉腸點解釋?」

万刀甲認真想了想,然後說:「愛情同合約一樣都係障眼法,你睇到嘅嘢未必重要,重要嘅嘢,通常細到你睇唔到。」

金水豎起拇指說:「講得好!不過你估錯咗。當時佢嘅答案,我夠膽講係驚天地泣鬼神。佢話,愛情嚟講其實有兩種:第一種叫『必然的愛』,佢同波娃就係咁樣,呢種係天長地久、唯一嘅愛情;仲有一種次要嘅愛,法文叫amours contingents,amours係複數,即係可以有好多個,而contingents就係偶然嘅意思,所以amours contingents──」

「我頂你個肺!阿水哥你噏夠咩『阿摩弓彈床』未呀?我已經好X煩啦,你仲成晚係咁弓彈床弓彈床,你可唔可以顧吓我感受呀?」万刀甲又忍不住大罵。

金水苦笑着說:「得得得,就快完。沙特同波娃講,除咗必然的愛,仲應該抱住開放嘅態度接受第二種愛,即係amours contingents,中文叫『偶然的愛』。留意,偶然的愛根據沙特講法,並唔等於我哋所謂劈腿,佢其實係一種認識世界嘅方法,所以比較接近於政府一直大力提倡嘅終身學習同埋持續進修。偉大嘅沙特認為,男人同女人都應該去滾,咁就可以對世界了解得更深。所以佢嘅愛情契約就係兜口兜面講明,甲乙雙方都可以用自己的方式探索世界,有絕對自由搞三搞四,但條件係:唔准講大話。沙特將劈腿提升到咁高嘅哲學層面,試問波娃又點拒絕呢?於是呢對情侶大聲宣佈:『我哋要革新愛情!』嗰一刻,咁啱有隻黑貓喺佢哋面前行過,唔覺意就見證咗呢段咁蕩氣迴腸嘅愛情故事。」

「然後呢?」万刀甲沒精打采地說。

「然後,咪好似facebook嗰個Relationship嘅選項咁樣,叫It's Complicated囉。波娃同西班牙畫家一齊嘅時候,沙特就去溝畫家個老婆;波娃愛上沙特嘅舊學生,沙特就迷戀波娃嘅舊學生。佢哋果然跟足契約,唔介意同對方交流艷史。沙特高峰期同時有七個女朋友,每次波娃呷醋,沙特就鬧佢嘅道德觀太『資產階級』。沙特嘅秘書有次請教佢:點可以令咁多女人相安無事?沙特終於講出個秘密:『我呃佢哋。』『連波娃都呃?』『尤其係呃佢啦!』最後佢兩個都冇分手,死咗仲葬埋一齊,雖然波娃戴住嘅,係另一個男朋友送俾佢嘅戒指。」

「呢份愛情契約咪即係一國兩制!你有你玩,就算你講大話,搞唔到我咪ok囉!不過水哥,雖然你號稱『廟街活地阿倫』,但真係九唔搭八。我今晚約你,實情係想請教你點樣可以同阿寶提早解約,你仲同我講不分手契約?你係咪玩我呀?」万刀甲再次激動起來。

沒有留言:

張貼留言