2013年10月18日 星期五

添馬男 - 發牌與官僚理性終結

中門大開    香港蘋果日報    2013年10月18日

王維基電視夢碎,由此反映自殖民地到一國兩制三十年之間,一步一步倒退。王維基由加拿大回流,起初搞回撥長途電話,遇上港英計劃開放電話市場,93年成立電訊管理局由澳洲聘請艾維朗做主席,負責策劃整個電訊市場開放,打破香港電訊壟斷,王維基的城市電訊以一系列出位廣告如「殺價超人」、「任你上」深入民心。第二波電訊開放來自固網,佢成立香港寬頻。當時港英市場開放政策以理性為基礎,由外國專家引入澳洲經驗。

香港難逃沉淪命運

王維基食住市場開放而成功,佢以為可過三關,押注第三次市場開放、更大影響力嘅免費電視。由開放政策之規劃、研究,都係由技術官僚主導,同時開放仲有數碼廣播電台。上屆政府希望通過開放市場刺激文化創意產業,用意良好,符合香港利益。殊不知換咗老闆後,政府決策多咗好多hidden agenda,王維基仍相信技術官僚,以為可以壓過政治勢力干預。

公務員及技術官僚一定向王維基派過定心丸,包括批出將軍澳工業邨用地畀佢起製作中心,王維基乃生意人,佢積極進取應有一定基礎,唔會全部係一廂情願。按目前透露內幕,由通訊局、工商及科技局、到三司會審,都表態支持發牌予王維基,而行會內官僚出身包括葉劉、羅范及林煥光,也支持發三個牌,由此可見,從官僚行政程序而言,發牌予王維基乃理所當然。

上屆政府最後一年,情況起咗變化,文件遲遲唔能夠交上行會討論,結果一拖再拖,明顯政治考慮壓倒官僚理性。從數碼廣播發牌可見,特區政府有政策,建制勢力有對策,用各種方法扭曲開放政策,其中一個方法係hea做,獲牌照之營運者根本無心做,鳳凰衛視係數碼廣播營運者,但大家唔多覺,真正有心營運嘅大班DBC,就忽然發生股東內訌,將大班趕出局。


今次獲發牌嘅有線及now,好可能都係hea做,大家有默契地維持現狀。王維基同樣死於真做,有人認為佢拍劇唔搞新聞時事,對特區及北京冇乜威脅,此言錯矣,劇集係意識形態產品,入屋,深入民心。TVB劇集反智及去政治化,完全符合維持現狀需要,若王維基拍出反映民心民情劇集,北京始終唔會放心。

王維基慘案,宣告香港一切決策,進入政治掛帥年代,再無官僚理性可言,特區管治大敗局,其勢已成,香港逃不過向下沉淪命運!

沒有留言:

張貼留言